DGCA-in airline-te 'fuel switch locking system' endik turin ti

Aviation regulator, Directorate General of Civil Aviation (DGCA) chuan Thawhṭanni khan airline tinte chu Boeing 787 leh 737 thlawhtheihnaa 'fuel control switch' chu July 21 hmaa enfiah vek turin a ti. Fuel control switch hi thlawhtheihna engine-a fuel pek luh dan lo thununtu ber a ni.

Thupek tih chhuah hi thla hmasa-a Air India Boeing 787 chesual kha a tlak hmain fuel switch a lo in off vang tih thlawhtheihna tlak chhan zirchianna 'preliminary probe report' aṭanga hmuhchhuah a nih vangin tih chhuah a ni. Federal Aviation Administration (FAA) chuan kum 2018 daih tawh khan Boeing thlawhtheihna model-te a 'fuel control switch'-ah harsatna a awm ṭhin tih chu a lo tarlang tawh bawk.

Inrinni liam taa Boeing 787-8 chetsualna chhuichianna preliminary report tih chhuah ah khan Aircraft Accident Investigation Bureau (AAIB) chuan thlawhtheihna chesual engine-a fuel pek luh chu tih tawp a nih avang a chesual zui ta a nih thu an tarlang. Thlawhtheihna cockpit voice recording aṭanga a lan danin pilot pahnihte hian fuel switch eng vanga off nge a nih an inzawt thawm pawh a hriat theih niin report-ah hian an tarlang.

Thlawhtheihnaa thil fel lo awm ṭhin thu hi Special Airworthiness Information Bulletin (SAIB) chuan tarlang mah se, Airworthiness lam hian a him tawk lohna leh kaihhruaina engmah an ti chhuak lo thung. Senior official-in an tarlan danin Air India hian Boeing 787 thlawhtheihna an enkawl a, Air India Express leh Spice Jet te hian Boeing 737 thlawhtheihna an hmang ve thung.