Axiom-4 mission hlawhtling takin khawvel leilungah lo kir

Indian astronaut Group Captain Shubanshu Shukla leh Axiom-4 mission 4 (Ax-4)-a crew member-te chu nimin, Thawhlehni khan khawvel leilungah an rawn kir leh ta.

Kennedy Space Center, Florida aṭanga June 25-a International Space Station(ISS) pana kah chhuah, Axiom-4 SpaceX Dragon spacecraft hi hlawhtling takin India huna chawhnu dar 2:31 bawr khan an rawn ṭum a ni.

Axiom-4 mission-ah hian Group Captain Shukla chu pilot a ni a, ani bakah hian crew member US mi Commander Peggy Whitson, Poland mi Mission Specialist Sławosz Uznanski-Wisniewski, leh Hungary mi Mission Specialist Tibor Kapu-te an tel. An vai hian himdam takin an rawn thleng thei a, ISS aṭanga khawvel panna atan hian darkar 22.5 hun an rawn hmang a, ISS-ah hian ni 18 chhung hun an hmang bawk.

Group Captain Shukla hi India mi zingah kum 41 liam hnua van thengrenga in kap kai leh hmasa ber a ni. ISS-ah hian Indian Space research Organisation (ISRO) tirhin microgravity experiment chi sarih a zo thei bawk. Heng experiment a tih te hi India in van thengreng chungchanga zirchianna a neihah hman ṭangkai theih a ni dawn bawk.

Mission crew te hi Space X recovery vessel Shannon-ah an hriselna enfiah sak an nih hnuin helicopter-in phurh chhuah ani ang a, Houston panpui an ni ang. ISRO tarlan danin Shukla pawh kar khat chhung vel rehabilitation programme hnuaiah enkawl zui a ni ang.