Gandhi-a lem oil painting Rs vbc 1.7 in hralh

India Independence sual chhuaktu pawimawh leh hruaitu ropui, Mahatma Gandhi lem ziak, oil painting chu London-a lilamna aṭangin GBP 152,800 (Rs vbc 1.7) a hralh a ni.

He lemziak hi GBP 50,000-70,000 (Rs nuai 58 - 81) vela hralh theih beisei a nih thu lilamtu, auction house Bonhams chuan a sawi a, mahse an beisei aiin an hralh to leh ta zawk a ni. Tu ngei lei tih leh mipui hmuh theiha pholan a ni dawn em tih an tarlang lo thung.

India hnam pa, Gandhi lem hi lemziak ṭhiam, British-American artist Clare Leighton-in kum 1931-a a ziah tawh a ni a, he oil portrait chauh hi Gandhi-a'n a lem a ziah tir awmchhun niin an tarlang. Hei mai bakah lemziaktu Clare Leighton hi Gandhi lem ziak tura a office luh phalsak artist tlemte zinga mi a ni bawk.

Gandhi lem hi kum 1931-a London a 'Second Round Table conference' hmanga a kal ṭuma ziah a ni Kum 1989-a a ziaktu thih hma zawng khan ama collection zingah dah a ni a, a thih hnuah a chhungte chuan an rochun a ni. Kum 1974-a mipuite hmuha phochhuah a nih ṭum khan lemziak hi Hindu right-wing kalfawr pakhat chuan chemin a bei a, hei vang hian lemziak pawh hi hmun eng emaw zatah siamṭhat a ngaih phah.