Russia oil lei khaihlak mah se India a buai dawn lo: Hardeep Singh Puri

Oil minister Hardeep Singh Puri chuan nimin khan oil chungchanga India dinhmun sawiin, Russia aṭanga oil chawkluhte khaihlak mah se ramdang, secondary sanction aṭangin chawk luh theih a nih thu a sawi. Oil mamawh phuhrukna turah an buai dawn lo tih a sawi.

Minister-in he thu a sawi hma, kar tir lam khan US president Donald Trump chuan Russia leh Ukraine-in ni 50 chhunga inremna an siam loh chuan, Russia aṭanga oil chaw lut ramte chu chhiah lak kawngah hrek an nih tur thu a sawi a ni. India leh China hi Russia aṭanga oil chaw luttu ram lian pahnih an ni. Kum 2022-a Russia-in Ukraine a run vanga khawthlang ram hrang hrangten Russia an hrek hnuah, Russia-in oil man a tih tlawm sak avangin India hian Russia aṭanga oil lak luh pawh a ti pung a ni. Hei vang hian inremna siam a nih loh chuan Russia aṭanga oil lak luh chu a khaihlak thei dawn a, mahse Guyana, Brazil, leh Canada aṭangin chawk luh theih a ni dawn tho tih Puri chuan a tarlang. Ram 40 dawn aṭangin oil hi an chaw lut thei dawn niin a sawi a ni.

India hi ram dang aṭanga oil a chawk luh zinga 35% hi Russia aṭang lak luh niin Iraq, Saudi Arabia, leh United Arab Emirates-te aṭangin a chaw lut bawk. Russia aṭanga a oil lak luh thlitfim hi mimal ta, Reliance Industries leh Nayara Energy-ah te tih ṭhin a ni bawk.