Rahul-an Bihar-a special intensive revision neih sawisel

Congress leader leh Lok Sabha-a Leader of Opposition ni bawk, Rahul Gandhi chuan nimin Ningani khan Election Commission(EC)-in kumin kum tawp lama assembly inthlan nei tur, Bihar-a Special Intensive Revision (SIR) hmanga electoral roll ennawnna a neih mek chu a sawisel.

Gandhi chuan EC chu Bihar-ah SIR hmanga vote ru angah a puh bakah, poll body chu a vaiin BJP 'Election chori branch(Election Theft Branch)' tiin a sawisel. EC hian roll ennawnna hi kum 22 hnua a neih lehna a ni. EC demna thu hi Gandhi chuan X kaltlangin a tarlang bawk.

Eptu party-te chuan roll ennawnna kalpui mekah hian citizenship document an neih loh avangin India mi ngei maktaduai tam takte chuan an dikna chanvo an neih loh phah dawn niin an sawi.