A vawi riatna atan India rama khawpui fai ber Indore

Madhya Pradesh-a khawpui lian leh mihring tamna ber, Indore chu Swachh Survekshan 2024-25 hnuaiah India rama khawpui, mi nuai 10 chuang chenna zinga fai berah thlan a ni, a zawna kum riat khawpui fai ber lawmman a dawnna a ni.

Ministry of Housing and Urban Affairs (MoHUA)-in Ningania Vigyan Bhawan, New Delhi-a Swachh Survekshan 2024-25 Awards ceremony a buatsaihah sorkarin cleanliness survey a neihah lawmmante hi President Droupadi Murmu in a sem a ni.

Kumin hi Swachh Survekshan neih vawi kuana niin khawpui 4,500 chuang endik a ni a, tehkhawng hrang hrang hmangin khaw chhung thianghlimna kalpui dan, bawlhhlawh sawngbawl dan leh service ṭhat leh ṭhat loh chungchangte teh an ni. Award hi 78 sem chhuah a ni a, category thar Super Swachh League Cities bakah mihring cheng tam dan azira category panga hnuaiah khawpui fai hi thlan chhuah a ni.

Super Swachh League Cities category-ah Indore bakah Surat leh Navi Mumbai te chu mi nuai 10 aia tam chenna khawpui fai zual pathum thlan chhuahah an lang. Mi nuai 3-10 inkar chennaah Noida chu fai berah thlangin, Chandigarh leh Mysuru ten an dawt. Swachh Shehar hnuaiah mi nuai 10 chin chenna khawpui zinga fai berah Ahmedabad chu thlan a ni a, Bhopal leh Lucknow chu pahnihna leh pathumna an ni.

Indore khawpuiah hian faina inzirtirna an kalpui ṭha hle a; rickshaw driver, street hawker, sumdawng leh mipui nawlpui pawhin khawpui faina turin theihtawp an chhuah hlawm a ni. Bawhhlawh paih dante khauh taka kengkawhin bawlhhlawh siam tlem dan turte pawh an inzirtir ṭhin bawk.