INDIA bloc-in Bihara SIR chungchangah meeting nei dawn

Eptu party intelkhawm, INDIA bloc chuan vawiin July 19, Inrinni hian Congress president Mallikarjun Kharge chenna in, New Delhi-ah meeting an nei dawn a, Bihar-a Election Commission-in roll ennawnna Special Intensive Revision(SIR) a kalpui chungchangah hmalak dan tur an sawi ho ang.

INDIA-a party hrang hrang hruaitute chuan Parliament Monsoon session neih huna put luh tur chungchangte pawh an ngaihtuah nghal dawn a, an sawi ho ber tur erawh chu Bihar chungchang a ni dawn a ni.

Bloc co-ordination committee chairman Tejashwi Prasad Yadav chuan Bihar-a SIR kalpui mek chuan mipui a nghawng nasat avangin chak taka dodalna a mamawh a ni tiin, roll ennawna hming paihte chuan sorkar welfare scheme chhawrtu tam tak a nghawng dawn a ni, a ti. SIR kalpuinaah hian Yadav-a chakna Diara thingtlang kilkhawr mi te chu BLO-in a la thlen phak loh vanga hming thai bo tam tak awm tur zingah an tel niin a tarlang bawk. Roll aṭanga an paih tawhte chu an hming dah luh leh chu thil theih a ni tawh loh tur thu Rashtrya Janata Dal leader chuan a sawi.

EC thuchhuah chuan, Bihar-a SIR kalpui meknaah voter nuai 35 hming chu roll aṭanga paih a ni tawh niin a tarlang.