India-ah darkar 24 chhungin Covid-19 vangin mi 62 an thi

India ramah Thawhṭanni khan Covid-19 vangin mi 62 an thi a, darkar 24 chhunga he hri vanga thi an tam ber ṭum a ni. 

Health and family welfare ministry chuan Thawhṭanni vek khan hri kai thar hi mi 1,543 an awm tih a sawi bawk. 

India ram state zingah Maharashtra chu hri kai tamna ber a la ni zel a, mi 8,590 in Covid-19 hi an kai a, mi 369 in an thihpui tawh a ni. Gujarat chu a dawttu niin, hri kai hi 3,548 an awm a, mi 162 in an thihpui tawh bawk. Delhi-ah pawh hri kai hi 3,000 an chuang tawh a, an zinga 877 chu enkawl dam ni tawhin he hri vanga thi hi mi 54 an awm. 

Health ministry-a joint secretary, Lav Agarwal chuan hri kaite chu thinhrik leh enhrang lo turin mipuite a chah. Hri kaite chu rang taka enkawl an ngai a ni, a ti. Hri leng dinhmun hriat­thiam tawk loh avangin a kaite pawh enhran leh thinhrik an ni tih a sawi a, hri leng chung chungah thu dik lo leh mipui tichiai thei thute thehdarh loh turin a ngen bawk. 

"Kan do ber chu he hri leng hi a ni a, a damlote an ni lo. Enhran leh thinhrik an tawh avangin dam loten an natna thup a, in enkawl tirte an hreh phah fo. Hei hi hri vei tan chauh ni lo, an chhungte leh a khawtlang tan pawh a pawi thei a ni," tiin Agarwal chuan a sawi. Hri darh chungchangah tumah inpuh­mawh tur a ni lo tiin, hri dona kawnga a hma tawngtu health­care leh sanitation worker-te chu bei lo turin a ngen bawk. 

Covid-19-in a nghawng loh district 300 awm: Health Minister Health minister Dr Harsh Vardhan chuan India ram chhungah hripui lengin a nghawng loh district 300 a awm tih a sawi. 

Autonomous institute leh public sector hnuaia awm Department of Biotechnology, DBT head-te chu nimin khan video conferencing hmangin meeting a neihpui a, hetah hian Dr Harsh Vardhan chuan ram pumah Covid-19-in a nghawng loh district 300 a awm laiin, hri leng hluarna hotspot district 129 a awm tih a sawi a, heng hotspot district-te hi sorkar chuan uluk takin a ngaihven reng tih a sawi a ni. 

District 80-ah chuan ni 7 liam ta chhung khan case thar a awm tawh lo a, ni 14 liam ta chhung khan district 46-ah case thar hmuh a ni tawh lo bawk, a ti. District 39-ah ni 21 liam ta chhung khan case thar hmuh belh a ni tawh lo a, ni 28 liam ta chhung khan district 17-ah chuan case thar hmuh belh a ni tawh lo bawk. 

NITI Bhawan-a director-level officer pakhat chu Covid-19 a kai tih hriat a nih avangin, nimin khan office building hi darkar 48 chhung khar tura tih nghal a ni. 

NITI Aayog adviser Alok Kumar chuan nimin zing dar 9 khan officer pakhat hian corona­virus hi a kai tih finfiah a ni a, hei vang hian office pawh khar nghal  niin, he office nena lo intlawhpawh tawhte chu inkhung hrang nghal tura hriattir an ni, a ti. Building hi damdawi hmanga kah nghal a ni bawk.