Vawiin aṭangin Parliament Monsoon session

Parliament Monsoon session chu vawiin, July 21 aṭangin neih a ni dawn a, August 21 thleng a awh ang.

Session neih dawna tih dan phung angin, nimin Pathianni khan sorkar laipui chuan all-party meeting a huaihawt a, eptu pawl aiawhte nen rorelna muanawm tak leh thawh hona ṭha neih dan turte an sawi ho.

Nimina all-party meeting-ah hian eptu pawl intelkhawm, INDIA bloc chuan session neiha ngaihtuah tur hrang hrang ṭul an tih te an tarlang nghal. Operation Sindoor kalpui laia US president Donald Trump-an inkahhai puang tura a tih vanga inkahhai puan ni anga sawi awm chungchang ngaihtuah te, tun hnaia Bihar-a vote roll revision ennawn chu ngaihtuah tur an sawi zingah hian an tarlang tel.

Sorkar laipui chuan eptu lamin ngaihtuah ho tura an thil ngiat hrang hrangte ṭha taka ngaihtuah a nih theihna turin session neih chhung hian thawh hona ṭha leh boruak muanawm an duh thu an sawi lang ve bawk.

Monsoon session-ah hian Lok Sabha-ah income tax bill thar chu pharh tum a ni. Income Tax Bill, 2025 hi kum 60 chuang lo hman tawh Income Tax Act thlakna tura tih a ni. Bill thar pharh tur zirchiang tur, member 31 thlan chhuah awmna kaihruai turin BJP leader Baijayant Panda chu Lok Sabha Speaker Om Birla chuan a ruat a ni.

Bill thar pharh tur hi tuna hman lai, 1961 Income Tax Act chanve vela tlem leh hriatthiam awlsam tura duan a ni. Section 536 awmin tuna hman laiah hian section 819 a awm thung, Chapter awm zat hi 23 niin hman laiah hian 47 a awm.