India-EFTA sumdawn tawnna October-ah hmang ṭan dawn

India leh Europe ram pali in telkhawmna, EFTA thawh hona tur inremna siam chu October 1 aṭanga hman ṭan a ni dawn tih Inrinni liamta khan commerce leh industry minister Piyush Goyal chuan a sawi. He thawh hona tur, Trade and Economic Partnership Agreement (TEPA) hi March 10, 2024 khan an lo ziak tawh a ni.

European Free Trade Association (EFTA)-ah hian Iceland, Leichtenstein, Norway, leh Switzerland-te an tel a ni. He inremna an ziah hi insumdawn tawnna ang chi huangah India-in inremna a neihpuina hmasa ber a ni bawk.

Inremna hnuaiah hian India chuan a thawhpui tur ram aṭang hian USD tld 100 investment chu kum 15 chhungin a hmu thei dawn a, hei hian India ramah hnathawh tur tam tak a keng tel thei dawn a ni. Hei bakah hian Europe ram pali aṭanga bungrua hrang hrang - Swiss sana, chocolates, leh diamond zai sa leh tih fai sa te chu zero duty emaw man hniam zawkin a chaw lut thei dawn niin an tarlang.

In sumdawn tawnna tura inremna a siampuite zingah hian India chuan Switzerland chu a sumdawn pui lian ber a ni a, member dang pathum erawh nen sumdawnna lian tham an la thawk ho lo thung. Inremna hian ramchhunga thil siam thawn chhuah kawngah nasa takin a pui thei dawn a ni. Switzerland-in European Union (EU) huam chhunga a thil thawn chhuah hi 40% a tling pha a, hei vang hian India thil thawn chhuahten huang zau zawk thlen theihna an nei thei dawn a ni.