Parliament-ah Rajya Sabha member thar 5 la lut

Parliament monsoon session chu nimin khan ṭan a ni a, session ṭan ni hian Rajya Sabha member thar panga lak luh an ni a, lak luh zingah hian president Droupadi Murmu-in a ruat mi pathum an tel. Session ṭan ni hian Pahalgam beihna thleng vanga thite leh Air India thlawhtheihna chesuala thite sunna hun an hmang nghal bawk.

Prime minister Narendra Modi chuan thu sawiin, Parliament Monsoon session chu Vijay Utsav, 'Hnehna Kutpui' a ni tih a sawi. Hei hi Indian armed force-te'n khawvel hmaa Operation Sindoor hmanga an hlawhtlinna an chan a sawina a ni.

Union Minister JP Nada chuan sorkar chu session-ah eng harsatna pawh sawi ho tura a in peih thu a sawi , hemi rual hian eptu pawlte chu eng thupuiah pawh sawi ho duh an nei a nih chuan kaihhruaina leh dan siamsa zulzuia sawi ho turin a ngen nghal bawk.

Nimina house pahnih, Lok Sabha leh Rajya Sabha-a rorel inkhawmah hian sunna hun hmang zawh veleh eptu pawl lamin Pahalgam beihna leh Operation Sindoor chungchang sawi ho nghal an phut a, rorel mumal thei loa an aubuai avangin chawhnu dar 2 thleng inkhawm tih tawp lailawk a ni.

Rorel inkhawm chhunzawm leh hnuah Rajya Sabha-ah rorelna pangngai taka kalpui a ni a, mahse Lok Sabha-ah erawh eptu lamte an thil phut ngai phuta an aubuai chhunzawm leh avangin inkhawm pawh tih tawp leh a ni. Congress party chuan May thlaa India leh Pakistan-te Trump-an inkhahhai a puantir nia a sawi chungchang chu sawifiah turin sorkar laipui an phut.

Union Civil Aviation Minister Ram Mohan Naidu chuan Rajya Sabha-a Air India chetsualna chungchang zawhna a chhannaah Aircraft Accident Investigation Bureau (AAIB)-in an chhuina report kimchang an thehluh hunah chauh thil thlen dan leh hma lak dan tur a chiang dawn tih a sawi. Naidu chuan thlawhtheihna chetsualna tuartute chu ang khat veka chhawmdawlna pek an nih thu a sawi bawk. AAIB hian preliminary report chauh an la theh lut a ni.

Rajya Sabha eptu MP 63 chuan Justice Yashwant Varma ina pawisa tam tham tak chhar a nih avangin a hna aṭanga ban tura an phutna an theh lut. Union minister Sarbanada Sonowal-a bill put luh, Bills of Lading Bill, 2025 chu ngaihtuah hoin clause-by-clause in bill hi pawm a ni bawk.

Parliament monsoon session hi August 21 thleng neih a ni dawn a, August 12-18 chhungin chawlh a ni ang. Ni 32 chhungin rorel ṭhutkhawm hi ṭum 21 an nei ang.