India rama hripui vanga thi zinga 70% mipa an ni
India ramah Covid-19 hri vanga thi mi nuai 1.48 an awm tawh a, heng zingah 70% chu mipa an ni.
Union health ministry data-ah a landanin, hripui vanga thi zinga 70% chu mipa niin, an zinga 75% chu kum 60 hnuai lam an ni. Ram puma hri kai hmuh chhuah tawh zinga 63% chu mipa an ni bawk a, an zinga 52% chu kum 18-44 inkar an ni bawk.
Hri kai hmuh chhuah thar 20,549 awm
Thawhlehni khan ram pumah Covid-19 kai hmuh chhuah thar mi 20,549 a nawm leh a, Thawhṭanni aiin hri kai thar hi 25% in a pung leh a ni. Ni hnih chhunga hri kai hmuh thar zingah, UK-a leng mek, Covid-19 chi hrang kai mi 20 an tel. Hemi ni vek hian hripui vanga thi mi 286 an awm belh leh bawk.
Ram pumah Covid-19 kai hmuh chhuah tawh hi mi 1,02,44,852 an tling tawh a, an zinga 1,48,439 chuan an thihpui tawh a ni. Hetih lai hian hri kai enkawl dam an pung chak ve zel a, recovery rate hi hi 95.99% ni tawhin, hri kai mek 2,62,272 chu hri kai hmuh tawh aṭanga 2.56% chauh an ni tawh.