Delhi sorkarin Singhu border-a loneitute tan Free WiFi hotspot siamsak dawn

Farm law duh lohna lantira Singhu border-a nawrh huaihawta awm mek, loneitute tan Delhi-a rorellai, Aam Aadmi Party (AAP) sorkar chuan free WiFi hotspot siamsak a tum. 

State hrang hrang aṭanga kalkhawm, Delhi khawdaia inkhuar mek, loneitute hian thla khat chuang sorkar laipuiin Farm Law pathum a siam thar duh lohna lantirin nawrh hi an huaihawt tawh a ni. 

AAP hruaitu, Raghav Chadha chuan Singhu border-a free WiFi  hotspot siam a nih tur thu puangin, he hmuna hun rei tak lo awm tawh tawh loneitute chu in lama an chhungte nena an inbiakpawh theih reng an duh tih a sawi. WiFi hotspot dahna turte pawh an thlang fel tawh tih sawiin, hei hi chief minister Arvind Kejriwal hmalakna a nih thu a sawi bawk. Singhu border-ah an dah hmasa phawt dawn a, a ṭul a nih chuan loneitute awmkhawmna border point dangah pawh an dah zel dawn tih Chadha chuan a sawi. 

Kejriwal leh AAP hian loneitute hi an thlawp ṭha hlei a, Kerjiwal hian Singhu border-a nawrh huaihawtte pawh hi a hmunah a lo tlawh tawh a ni.