Rajnath Singh-a'n Canada PM sawisel

Defence minister Rajnath Singh chuan Farm Law duh lohna lantira nawrh huaihawt mek, loneitute a thlawpna thu a sawi chungchangah Canada prime minister Justin Trudeau chu sawiselin, ram chhung thila inrawlhah a puh. 

Justin Trudeau hian India rama loneitu pawlten nawrh an huaihawt mek ngaihven a ngai tih sawiin, Canada ram chuan boruak muanawm tak hnuaia nawrh huaihawt chu a thlawp thu a sawi a ni. US-a roreltu ṭhenkhat pawhin loneitute  hi an thlawp thu an lo sawi tawh bawk. 

Rajnath Singh chuan Canada PM thusawi hi chhangin, "Eng ram prime minister mahin India ram chhunga inrelbawlna chungchangah sawi an lo nei ve tur a ni lo. Kan buaina chu keimahniin kan chingfel mai ang. Hei hi ramchhung thil thleng a ni a, eng ram mahin an duh dana lo sawi turin dikna an nei lo a ni," a ti.