Vice President Dhankhar banna pawmsak

India vice president Jagdeep Dhankhar chuan Thawhṭanni zan khan president Droupadi Murmu hnenah vice president a nihna aṭanga banna a theh lut a, President hian a lo pawmsak nghal a ni. Dhankhar hian a hriselna lam ngaih pawimawh a ngaih vang leh damdawi lam thiamte thurawn anga bang a nih thu a tarlang.

Parliament Monsoon session ṭanni, Thawhṭannia Rajya Sabha ṭhutkhawmah khan chawhma lamah Dhankhar hi a inlan a, chawhnu lama luh khawm leh a nih khan a lut ve tawh lo thung. Zanah President hnenah banna a theh lut zui ta a ni.

Kum 74 mi, Dhankhar ban chhanah hian chhan dang a awm nia an rin thu eptu pawl Congress lam chuan nimin Thawhlehni khan an sawi a, a chhan dik tak sawifiah turin sorkar laipui an ngen zui bawk. Mahse, a hriselna dinhmun vanga bang a nih tih thu bak sawi dang a la awm lo.

Dhankhar hi kum 2022 August thla khan Vice President atan lak luh a ni a, kum nga term niin 2027 thleng tur a ni. Vice President zingah term hmang zo loa bang pathumna a ni. Kum 1969 khan VV Giri chuan indepdendent candidate-a president thlannaah chuh a tum avangin vice president a nihna aṭangin a bang a, kum 2007 khan Bhairon Singh Shekhawat chu president thlannaah a chak zawh loh avangin a term hmang zo loin vice president a nihna aṭangin a bang bawk. R Venkataraman, Shankar Dayal Sharma leh K R Narayanan te pawh vice president aṭangin an lo bang tawh, mahse anni hi President atana thlan tlin an nih avanga bang an ni thung. India Vice president nih laia thi awmchhun chu Krishan Kant niin, kum 2002 July thla khan a thi a ni.

Vice president a ban tak avangin a thlak tur hi Constitution phut angin a rang thei anga thlan a ni ang. Article 66 hnuaiah vice president hi Parliament in hnih, Lok Sabha leh Rajya Sabha member te chauh awmna, electoral college in 'secret ballot' hmangin a thlang dawn a ni.