INDIA bloc MP-ten Bihar-a SIR kalpui duh lohna lantir

Eptu party intelkhawm, INDIA bloc MP-te chuan nimin khan Parliament Complex-ah Election Commission-in Bihar-a electoral roll ennawnna, Special Intensive Revision (SIR) a kalpui mek duh lohna an lantir. Eptu MP-te chuan roll ennawn mek chu ti tawp tur leh, hemi chungchang hi Parliament in hnihah sawi ho an phut bawk.

Nimina Parliament rorel inkhawm hmaa lungawi lohna lantirnaah hian eptu party hrang hrang - Congress, DMK, TMC, Samajwadi Party, Shiv Sena (UBT), JMM, RJD bakah Left party MP-te an tel. BJP kaihhruai sorkar demna thu leh, SIR an duh loh thute an aupui a, thu ziakte an keng tel bawk a ni.

Eptu party-te hian Parliament monsoon session neih mekah Parliament in hnihah SIR kalpui mek hi an duh loh thu pawh an lo sawi tawh bawk.

INDIA bloc hruiatute chuan meeting an lo nei tawh bawk a, he hunah hian Congress party president Mallikarjun Kharge leh Lok Sabha Leader of Opposition Rahul Gandhi te pawh an tel. Meeting-ah hian Pahalgam beihna, Operation Sindoor, Donald Trump-in India-Pakistan inkahhai a puantir nia a sawi leh, Bihar-a SIR kalpui mek bakah thil dang pawimawha zawhna an neihte chhang tura House-ah prime minister Narendra Modi chu awm ve ngei tura nawr an rel bawk a ni.

Bihar-ah hian kumin kumtawp lamah assembly inthlan neih a ni dawn a, inthlan dawn hnaihvai taka electoral rolll ennawn a ni leh, nihna finfiahna atana Aadhaar number pawm tel a ni lote chu eptu lam hian an sawisel a ni. Supreme Court-ah pawh thlenin, July 10 khan court chuan EC hnenah Aadhaar, voter ID leh ration card-te chu roll ennawn meknaa nihna finfiahna tur document hman tur zingah pawm turin a ti tawh bawk a, hemi chungchang hi July 28 ah ngaihtuah leh a ni ang.