Punjab-ah President Rule puang turin phut

Punjab-a Congress unit hotu Amarinder Singh chuan Sutlej-Yamuna Canal link chungchanga Supreme Court thutlukna siam danah an lungawi loh thu sawiin, Chief Minister Parkash Singh Badal chuan politics lama hlawkpuina umin harsatna a siam duh mai theih avangin, an state chu President Rule hnuaiah dah tura a phut thu a sawi.

Punjab-a eptu pawl, Congress MLA 42-te chu SYL buaina chungchangah, Supreme Court chuan an state aiin Haryana an duhsak zawk nia sawiin an bang a, nimin khan MLA-te hian Assembly Speaker a awm loh avangin Assembly Secretary hnenah SC thupek duh lohna lantir hian banna lehkha an thehlut nghal a ni.

Amarinder Singh chuan CM Badal chu an state mipuite hamṭhatna neih tur pawh veng him zo loah a puh a, Pathianni hian Congress party chuan lungawi lohna kawngzawh an tum thu a sawi.

CM Badal leh a kaihhruai sorkar chuan Punjab dikna chanvo neihte a hum zawh loh avangi an lim an hal dawn tih Amarinder chuan a sawi a, CM chuan ama hlawkna tura sum siam ringawt a ngaihtuah a ni, a ti.

Sutlej-Yamuna Link (SYL) canal tui insem chungchangah inremna siam tihtawpna dan, Punjab Termination of Agreements Act, 2004 siam chu Supreme Court chuan danpui kalh a ni tihsakin, he dan hi a siam ngawt theih lo niin a sawi. Punjah hian SYL canal tui insemna tur hian Haryana, Himachal Pradesh, Rajasthan, Jammu and Kashmir, Delhi leh Chandigarh te chu inremna a lo siampui tawh a ni.

Punjab Congress chuan SYL canal
aṭanga an state-in tui a lak theih zat zir≠chiang tur hian tribunal din an phut a, tui insem dan chungchangah SC thutlukna siam chuan Punjab mipui nuai tel te chu a nghawng dawn a ni, an ti.