Rs 2,000 note design put ru chhui dawn

Sorkar laipui chuan Rs 2,000 note thar chu, tihchhuah a nih hmaa social media lama a design a lo darh avangin a chhui chiang dawn. Ningani khan Rs 2,000 note thar hi tlangzarh a ni.

Reserve Bank of India central board chuan thla eng emaw zat liamtaah khan Rs 2,000 siam turin thutlukna a lo siam tawh a, mahse hemi chungchang hi thup tlat a ni. Prime Minister Narendra Modi-aín Rs 500 leh Rs 1,000 note tih thih a tum pawh hi kumin kumtir lama a thutlukna siam a ni a, mahse official tlemte chauhin he thil hi an hria nia sawi a ni.

RBI-in Rs 2,000 note a tihchhuah hma hian social media lamah note thar chhuak tur hi a darh tawh a, hmun ṭhenkhatah chuan a thlalak nen te tarchhuah a ni bawk.

Finance Ministry official chuan, Rs 2,000 note hi RBI bank vault-a an print leh semchhuah laiin a thla lo lak hman a ni thei tih a sawi a, hei hi an thehdarh ta nia a lan thu a sawi. Khawi aṭanga darh nge tih an chhui dawn tih a sawi bawk. Mahse pawisa tih thih tur erawh chu tuman an hre lawk lo tih a sawi.

Official-te chuan Rs 2,000 note thar hi Rs 500 leh Rs 1,000 note hlui lakah a design leh security feature te a danglam a, a te deuh zawk bawk a, hei vang hian a lem siam pawh a har phah dawn niin an tarlang.