Modi-a'n tihsual a neih chuan tuar a inhuam

Prime Minister Narendra Modi chuan eirukna leh black money do turin a kaihhruai sorkar chuan a bei chhunzawm zel dawn tih a sawi a, pawisa note hlui tih thih avanga mipuiten December 30 hnu lamah harsatna an la tawk chhunzawm reng a nih chuan hremna tawk turin a inpeih tih a sawi.

Nimina Goa-a thu a sawiah, PM Modi chuan ram rawngbawl hna thawk turin a chhungte leh a thil neih zawng zawng a kalsan tih a sawi a, India rama pawisate ramdanga rukchhuah a nih chuan chung lakkir leh chu a tih tur a ni tih a sawi. India ram chu eirurkna laka fihlim rama siam a tum tih sawiin, kum 2014 inthlanpuia thlan tlin an nih chhan pawh mipuiten eirukna umbo an duh vang a ni, a ti.

Sorkar laipuiin pawisa note ṭhenkhat a tih thih chu eirukna leh black money thenfaina tura hmalakna pawimawh tak a nih thu PM chuan a sawi. Hemi atan hian thla sawm kalta khan hma a lo lak ṭan thu a sawi a, pawisa note tih thih chu mi retheiten an ṭhatpuina tur zawk ngaihtuaha ti a nih thu a sawi.

Sum chheprelh tam lutuk tibo tur chuan theihtawp a chhuah zel dawn a, he thil dodaltuten hal hlum hial tum mah se a beih zel tur thu leh, a nunna derthawngin awm mah se a tawpsan dawn lo tih Modi chuan a sawi bawk.