Kerala-in December 30 thleng pawisa note hlui hman dil

Kerala Chief Minister Pinarayi Vijayan chuan sorkar laipuiin Rs 500 leh Rs 1,000 note a tih thih tak avangin mipuiten harsatna nasa tak an tawk tih sawiin, pawisa note hlui hi December 30 thleng hman phalsak turin a ngen.

CM Vijayan hian nimin khan Delhi a pan a, Union Finance Minister Arun Jaitley-a hmuin, pawisa note thih avanga an state mipuite buaina tawh dante a hrilh dawn a ni.

Pawisa note tih thih a nih thu a puan hnu lawka Prime Minister Narendra Modi-a rampawn lama a zin chhuak chu sawiselin, Kerala CM chuan mipuite buaina leh manganna nasa tak an tawh laiin PM chu ram pawn lamah a awm daih a ni, a ti.

Sorkar laipui thupek tihchhuah hian mipui nawlpuiah harsatna a thlen a, eng sorkar mahin hetiang thil hi a ti tur a ni lo tiin, Vijayan chuan mipuite chu December 30 thleng pawisa note hlui an hman phalsak turin a ngen. Pawisa note hlui hman theih loh vang hian hnathawktu hlawh pek thlengin a nghawng a, hnathawh chhunzawm theih loha chawlhsan te a awm a, dawr tam tak pawh an inkhar phah niin a sawi.

Black money tihtawpna tur tia sorkar laipuiin a sawi chu chhangin, he thil thleng avang hian black money neiten buaina an tawk lo a, a buai ber chu mipui nawlpuite an ni, a ti. Pawisa tih thih tur chungchang chu sorkar laipui nena inhnimhnai tak takten an lo hre lawk a, hei vang hian heng mite hi an lo inchingfel hman vek niin a sawi.