Ramchhung Lawrkhawm

Bank kawtah Congress-in nawrh huaihawt

Gujarat Congress hruaitu leh worker-te chuan Ahmedabad-a Reserve Bank of India (RBI) office leh bank hrang hrang kawtah lungawi lohna an lan tir.

Congress member-te chuan sorkar laipuiin Rs 500 leh Rs 1,000 note a tih thih avangin mipuite chungah harsatna lian tak a thlen a ni tiin, pawisa thlengna tur note thar mamawh ang tawk a pekchhuak loh avangin sorkar an dem thu an sawi. Nawrh huaihawt zinga mi eng emaw zat chu man an ni.

Jaya-in damdawi-in chhuahsan thei tawh

Tamil Nadu Chief Minister J Jayalalithaa-i chu hun rei tak Chennai-a Apollo Hospital-a enkawl a nih hnuah a ṭha chho zel a, damdawi-in pawh a chhuahsan thei tawh niin a enkawltu doctor-te chuan an sawi.

Kum 68 mi, Jaya-i hi September 22 khan Apollo Hospital-ah hian dah luh a ni a, doctor thiamte hun rei tak an enkawl hnuah lung lama harsatna a neih pawh a ṭha chho a, hma a sawn chho zel a ni. Doctor-te chuan Jaya-i hian chak lam a pan chhoh zel avangin a duh a nih chuan damdawi-in aṭang hian a chhuak thei tawh tih an sawi.

Delhi-ah diesel motor dap hna thawk tan

Delhi khawpui chhungah diesel heavy vehicle, kum 15 aia upa dap hna chu nimin aṭang khan thawh ṭan a ni a, heng motor-te hi khawpui chhunga tlan phalsak an nih tawh dawn lo bakah, park pawh phal a ni tawh dawn lo.

State transport department chuan khawpui chhunga diesel heavy vehicle list, nuai 1.91 bakah a neitu hming, registration number leh address-te chu state traffic police hnenah a pe tawh a ni. National Green Tribunal chuan diesel motor, kum 15 aia upa te registration chu tihtawp vek turin a lo hriattir tawh a ni.