Ramchhung Lawrkhawm

Nehru-a zahna hlan

Nimin khan India ram Prime Minister hmasa ber, Jawaharlal Nehru piancham vawi 127-na a ni a, New Delhi-a Shanti Van-ah hruaitu hrang hrangten zahna pangpar an dah.

Prime Minister Narendra Modi chuan a twitter-ah Nehru-a zahna a hlan thu a ziak a, President Pranab Mukherjee leh Vice President Hamid Ansari, PM hlui Manmohan Singh, Congress vice president Rahul Gandhi leh Delhi CM hlui Sheila Dikshit-te chuan a thlanah pangpar an dah. He hmunah hian school naupangten hnam hla an sak a, a hnuah tricolor balloon chhuah a ni bawk.

Pakistan sipaiten tum 286 inremna bawhchhe tawh

India sipaiten Pakistan ram chhunga surgical strike an neih hnuah, Pakistan sipaite chuan ram pahnihten Jammu and Kashmir-a Line of Control leh International Border-a inkahhai thuthlung an lo siam tawh chu ṭum 286 an bawhchhe tawh.

BSI official-te chuan LoC-ah hian Pakistan sipaiten ṭum 104 silai hmetpuakin, IB-ah India lam hawiin vawi 186 silai an hmetpuak tawh bawk tih an sawi. LoC hi km 190 chuanga thui niin, IB hi km 500 chuang a ni.

LS-in media-te tih tur leh tih loh tur tichhuak

Lok Sabha secretariat chuan Parliament thlasik ṭhutkhawm neih turah, TV reporter leh photographer-te tih tur leh tih loh tur kaihhruaina a tichhuak. Thupek hi an zawm lo a nih chuan ni hnih chhung atan hrem theih an ni ang.

Parliament thlasik ṭhutkhawm hi naktuk aṭangin ṭan a ni dawm a, hemi chhungah hian Parliament complex-ah media-te chu phalna nei loa minister leh Parliament member ni lote lo kawm kual lo tur leh, an thla laksak lo tura tih an ni. Minster leh MP-te an kawm dawn pawhin, a kawmna tur hmun bik ruatah an kawm tur tih a ni.