November 24 thleng pawisa note hlui pawm a ni dawn

Sorkar hospita, petrol station leh toll booth hrang hranga Rs 500 leh Rs 1,000 note hlui pawm theih hun chu November 24 zanlai thleng pawhsei a nih thu nimin khan sorkarin a puang.

Nimin aṭang khan bank account aṭanga sum lakchhuah theih zat pawh tihsan a ni bawk.

Pathianni khan Reserve Bank of India chuan Rs 500 note thar chu a pe chhuak a, hei hian sum thlengna kawnga harsatna awm tam tak a sutkian phah beisi a ni. Rs 500 note tharah hian a print kum, 2016 a lang a, a hnung lamah Swachh Bharat logo dah a ni a, Red Fort thlalak a lang bawk. Note hlui aiin a colour, size, theme leh security feature ah pawh a danglam vek a ni.

ATM aṭanga pawisa card pakhat hmanga pawisa lakchhuah theih zat pawh Rs 2,000 aṭangin Rs 2,500-ah tihsan a ni a, bank-a thleng theih zat pawh Rs 4,000 aṭangin Rs 4,500-ah tihsan a ni bawk. Bank aṭanga sum lakchhuah theih zat chu kar khat atan Rs 24,000-ah tihsan a ni bawk. Bank hrang hrangte chu pawisa lakchhuah leh thleng tum, kum upa zawk leh taksa lama rualbanlo te tan intlarna hran siam tura hriattir an ni.