Ni ruk cham turin Israel President a rawn zin

Israel President Reuven Rivlin chu ni ruk cham turin nimin zing khan Mumbai a rawn thleng.

Rivlin-a hi sumdawng leh academician aiawh eng emaw atin an rawn zui a, nimin vek han Mumbai aṭangin Delhi a pan nghal.

India rama a cham chhungin Israel President hian Prime Minister Narendra Modi, External Affairs Minister Sushma Swaraj te a kawm dawn a, ram pahnihten thawhdunna project hmun eng emaw zat a tlawh bawk ang. Chandigarh-a agrotech conference chu President Pranab Mukherjee nen an telpui dawn bawk a ni.

Israel President hian kum 2008-a firfiakten Mumbai khawpui an beih ṭuma thite hriatrengna hmun siam chu tlawhin zahna a hlan a, Mahatma Gandhi thlan leh Indopui I hunlaia India sipai thite hriatrengna hmunah pangpar a dah bawk ang.

India pana a chhuah hmaa chanchin thar lakhawmtute a kawmnaah, Rivlin chuan India chu Israel ṭhianṭha leh thawhpui ṭha tak a nih thu sawiin, ram pahnihte chuan duhdan leh ngaihhlut zawng in ang tam tak an nei a ni, a ti. India ram a tlawh tur chu Israel tana thil pawimawh tak a nih thu a sawi.