India leh UK-in in sumdawn tawnna tur inremna ziak

UK prime minister Keir Starmer leh UK-a zin mek, prime minister Narendra Modi te uapna hnuaiah India leh UK chuan insumdawn tawnna tura inremna, Free Trade Agreement (FTA) chu nimin khan London-ah an ziak.

Union minister Piyush Goyal leh Britain minister Jonathan Reynolds ten inremna hi Chequers-ah an ziak. He inremna hi UK-in European Union (EU) a chhuahsan hnua economy nghawng thei tur insumdawn tawnna an neih langsar ber a ni bawk.

Ram pahnihte inremna ziahah hian kumtin India leh UK insumdawn tawnna aṭangin GBP tld 25.5 tling thei tura tih niin, hna tam tak a ken tel dawn bakah ram pahnih ṭhanna atan a pui thei dawn bawk. Hei bakah hian bungraw chawk luhah chhiah eng emaw zat a hniam phah dawn a ni. Britain aṭanga bungraw thawn chhuaha India chhiah lak chu 15% aṭangin 3%-ah a tlahniam dawn a; soft drinks, cosmetics, lirthei leh damdawi lam hmanrua UK aṭanga chawk luh pawh a awlsam sawt dawn a ni.

UK PM Starmer chuan,"India nena in sumdawn tawnna tura inremna siam hian Britain tan hlawkna lian tak a thlen dawn a ni" tiin, "He inremna hian Britain-ah hna tam tak a siam bakah, sumdawnna kawng thar a hawng dawn a, ramchhung hmun hrang hrang ṭhanlenna kawngah a pui dawn a ni," a ti.

Ram pahnih hruaitute hian UK-India Vision 2035 an khuh hawng nghal bawk a, he hmathlirah hian sumdawnna huanga thawh dunna bakah, defence huanga thawh dunna tharte, ramri venhim kawngahte, innovation, zirna leh sik leh sa inthlak danglam siam ṭhatna kawnga thawh dunna turte a tel.

PM Modi chuan UK nena an thawh dunna thar kaltlang hian sector hrang hrang, technology, health, education, leh sustainability huangah hmasawnna langsar tak a thlen dawn tih a sawi. Inremna hian ram pahnihte tan inkungkaihna ṭha, investment ngelnghet, leh hausakna inṭawm a thlen dawn niin PM Starmer chuan a sawi bawk.