Lok Sabha Speaker-in all-party meeting a ko

Parliament Monsoon session neih mekah eptu pawl intelkhawm , INDIA bloc MP te'n inthlan hmabak Bihar a Special Intensive Revision (SIR) kalpui chungchang sawi ho phutin an aubuai chhunzawm zel a, rorel mumal theih loin ni eng emaw zat an awm tawh. Hei vang hian Speaker Om Birla chuan nimin khan all-party meeting a ko a, house-a tluang taka rorelna kalpui theih a ni dan turte an sawi ho.

Thawhṭanni aṭang khan Parliament session hi neih ṭan a ni a, session ṭanni aṭangin nimin thleng khan Lok Sabha-ah mumal takin ro an la rel thei lo. Hun leh sum tam tak khawhral a nih avangin, kar leh Thawhṭanni aṭang chuan khaihlak awm tawh loa rorel a nih theihna turin all-party meeting hi neih a ni a, poltical party hrang hrang hruaitute an tel a ni. Thawhṭanni hian Lok Sabha-ah Operation Sindoor chungchang sawi ho a ni ang.

Speaker Om Birla chuan democracy-ah chuan ngaihdan in ang lo hi thil thleng fo ṭhin a nih thu leh, harsatna awmte chu debate leh sawi hona aṭanga ngaihtuah tur a nih thu a hrilh. House chhunga aurual leh placard ken ṭhin hmanga harsatna chinfel chi a nih loh thu a sawi.

Bihar-a SIR kalpui vang hian INDIA bloc MP te chuan Parliament house complex ah lungawi lohna lantirin an pungkhawm a, party hrang hrang DMK, RJD, TMC, JMM, Samajwadi Party leh left party hrang hrang MP bakah Lok Sabha-a Leaader of Opposition Rahul Gandhi leh Congress President Mallikarjun Kharge-te an tel. SIR duh lohna lantirin SIR tih inziahna placard chu pawtthlerin bawlhhlawh bawmah an paih bawk.