AI thlawhtheihna chesuala thi chhungte hnenah zángnadawmna pe

Air India thlawhtheihna, June 12-a Ahmedabad-a BJ Medical College-a a tlak avanga thi chhungte hnenah Air India chuan Inrinni liam ta khan zángnadawmna thawh khatna, Rs nuai 25 ṭheuh a pe chhuak.

Zángnadawmna pek chhuah hmasak hi, chetsualna thlenga thi chhungte, mi 166 hnenah pek niin, chhungkaw dang 52 pek hmabak an la awm a, buaipui ngai te buaipui mek a ni tih airline chuan an tarlang. Air India hian chhiatna thlenga thi chhungte hnenah hian Rs nuai 75 pek an nih tur thu a lo puang tawh a ni.

Airline hian thlawhtheihna a chetsual hnu, June 14 khan chhiatna thleng vanga thi leh dam chhuak chhungte hnenah zángnadawmna pek an nih tur hi an lo puang tawh a, mahse buaipui tur hrang hrang a awm avangin a pek chhuah hi duh angin a chak thei lo niin an tarlang. Zángnadawmna pek chhuah hi thlawhtheihnaa chuang thi mi 147 chhungte hnenah leh, a tlakna hmun lei lama thi mi 19 chhungte hnenah pek a ni tih an tarlang bawk.

Thlawhtheihna chetsual hnu hian Tata Group chuan 'AI-171 Memorial and welfare Trust' chu chhiatna tuartute tan an din tawh a, chetsualna thleng vanga thi chhungte hnenah hian ralna atan Rs vbc 1 pek a nih tur thu pawh an puang tawh a ni.