Loneitu leh sorkar laipui inbiaknaah Agenda pahnihah inremna siam thei

Farm law siam thar duh lohna lantira nawrh huaihawt mek, loneitu aiawhte leh sorkar laipui aiawhte chu Nilaini khan nawrh huaihawt hnua a ṭum rukna atan an inbe leh a, January 4 ah inbiakna hi chhunzawm leh a ni ang. 

Nilainia inbiaknaah hian Delhi border-a lungawi lohna lantira nawrh huaihawt mek, loneitu pawl hrang hrang aiawh mi 41 an tel a, sorkar lam aiawhin union minister pathum an tel bawk. 

Darkar nga dawn inbiakna an neih hnuah, an thil ngaihtuah pali zinga pahnih - power tariff tihsan siamṭhatna tur leh thlai ro halte hnena hremna pek dan tur, draft Electricity (Amendment) Bill leh Air Quality Management Ordinance (containing penal provisions for stubble burning)  chungchangah inremna an siam thei a ni. Hetih lai hian loneitu lamin an phut ber, farm law thar pathum sut leh MSP chungchangah erawh an la inlungrual thei lo. 

Union agriculture minister Narendra Tomar chuan January 4 chawhnu dar 2-ah inbiakna hi chhunzawm leh a ni dawn tih a sawi a, hemi rual hian loneitu pawlte chu khawvawt hnuaia nawrh huaihawta Dehli border-a inkhuar loneitute chu an in lamah, an chhungte bula haw tura ngen tura a duh thu a sawi. 

Loneituten farm law pathum sut an phut chungchangah sorkar laipui chuan sut a tum loh tih a la sawi reng a, heng dante hi sut loin, loneitute nena inremna siama a ṭul anga siamṭhat erawh a inhuam reng tih a sawi a ni.