Sokar laipuiin eptu pawlte phatsantuah a puh

Parliament monsoon session neih mekah nimin, Thawhṭanni khan Lok Sabha-ah Pahalgam beihna leh Operation Sindoor chungchangah debate neih a ni. Mahse debate zawh hmain eptu member-te chu chhuakin Parliament complex-ah Bihar-a Special Intensive Revision (SIR) sawi ho ngiatin lungawi lohna an lantir leh. Hei vang hian sorkar chuan eptute chu debate nei tura inremna neih tawh zawm loah puhin, phatsantu an ni tiin a sawi.

Parliamentary affairs minister Kiren Rijiju chuan thuthar lakhawmtute hnenah eptu pawlte chuan Operation Sindoor leh Pahalgam beihna chungchanga debate neih zawh hnua Bihara SIR kalpui dan sawi hona neih pui leh turin sorkar an ngiat tih a sawi. Operation Sindoor debate neihna tur aṭangin an tlan bo a ni, ati.

Nimina Lok Sabha-a Operation Sindoor leh Pahalgam chungchanga debate hi darkar 16 chhung awh tura huaihawt niin, vawiin lamah hian Rajya Sabha-ah hemi chungchang bawk hi debate neih leh tura ruahman a ni. Operation Sindoor chungchangah hian defence minister Rajnath Singh chuan hnehna ropui leh huaisenna lantirtu a nih thu a sawi a, Pahalgam beihna thleng pawh chu nunrawng taka chetna leh India dawhtheihna enchhin tumna a nih thu a tarlang bawk.

Debate neihnaah hian Rajnath Singh chuan Operation Sindoor chu India-in a ramri a humhimna a nih thu leh ralmuanna ti chhe thei zawnga che te lakah sipai tha chakna hman hlawhtlinna a nih thu a sawi. Operation kalpuina hnuaiah hian firfiak pawl hmun chu minute 22 chhung leka beih fel a nih thu leh, buaina ti pun lun lo tura tih a nih thu a tarlang tel.

Rajya Sabha-ah chairman-in 'Carriage of Good by Sea Bill, 2025' member nena sawihona neih a tum mek laiin house-ah in auh buaina chhuakin ṭhutkhawm hi tih tawp a ni zui nghal.