Chhattisgarh-ah human trafficking vangin mi 3 man
Government Railway Police (GRP) chuan Zirtawpni liamta khan Durg, Chhattisgarh-ah Balrang Dal in mihring hmanga sumdawnna, human trafficking a inhnamhnawiha an puh mi pathum an man. An man zingah hian Catholic nun pahnih an tel a, ni 14 chhung judicial custody-ah dah an nih thu police chuan an tarlang.
Mihring hmanga sumdawnnaa inhnamhnawih nia sawite lakah hian BNS Section 143 (trafficking of person) hnuaiah thubuai siamsak an ni. An pathum hian Agra aṭanga rawn kal niin an tarlang a, hmeichhia kum 18-20 inkar pathumte an hruai lai chu Bajrang Dal activist-ten lo hmuin man an ni. Agra-ah training tura hruaia, a hnuah hna thawh tur pek an tiam niin an puh.
Bajrang Dal member-te chuan mihring hmanga sumdawnnaa inhnamhnawih leh sakhaw inlehtir tute laka action na taka la turin an phut tih an sawi. Nun-te hi chhan nei loin Durg-ah hian an kal a, hmeichhe pathumte chu an hruai chhuah hmain an lo hmu fuh niin Bajrang Dal hruiatu, Ravi Nigam chuan a sawi.
Hetih lai hian Kristiante chu man tawk nun-te thlavang hauhin GRP Durg station-ah an pungkhawm ve nghal bawk. Nun te hi Sisters of Mary Immaculate (ASMI) ami niin, Raipur Archdiocese-a father Sebastian Poomattam chuan Bajrang Dal in an puhna chu thu dik lo a ni, a ti. Nun-te hian hmeichhiate chu Agra-a hna thawk tura hruai an nih thu leh, an nu leh pate hnen aṭang pawhin phalna lehkha an la vek niin a tarlang.