CBI-in cybercrime thubuaiah mi 3 man

Central Bureau of Investigation (CBI) chuan dan loa fund lakna tana account siamtu laka cybercrime thubuai an ziahluh hnuah mi pathum, account neitu leh mi bumtu nia hriat mi pahnih an man. He account-ah hian an mi bumte aṭangin July 2 hian Rs vbc 3.81 an dawng tih CBI official-te chuan an sawi.

CBI Economic Offences Branch (EOB) Mumbai chuan thu an dawn bawhzuiin account hi an enfiah hnuah account neitu bakah cyber hmanga mi bum ṭhin bakah bank official-te lakah thubuai hi an ziak lut a ni. Official chuan, "He account-ah hian an mi bum hrang hrangte hnen aṭangin July 2 khan ni khat thil thuah Rs vbc 3.81 a lut a ni.Sum hi an dawn hnuah account lem an siam dang tam takah an transfer nghal a ni," a ti.

Heng an mi man te hi Sudhir Bhaskar Palande, account neitu, Yash Thakur agent anga ṭang, leh operator Shaurya Sunilkumar Singh-te an ni. Chhuichianna an neih aṭangin CBI hian pawikhawihna tur atana siam, KYC kalphung pangngai loa account an siam dante pawh an haichhuak a ni. Heng bakah hian document hrang hrang leh digital evidence, mobile phone, iPad, bank account hawnna leh pawisa an inthawn kual dante pawh an hmu chhuak bawk.