Hel 3 kahhlumte Pahalgam beihnaah an inhnamhnawih: Amit Shah

Union home minister Amit Shah chuan nimina Parliament Monsoon session-ah Thawhṭanni zinga security force-te'n Dechigam, Jammu and Kashmir-a Operation Mahadev an kalpuinaa hel pathum an kahhlumte chu April 22-a Pahalgam beihnaah khan an inhnamhnawih tih a sawi. Security-in an kahhlumte hi Suleiman, Parvaiz Jothar leh Bashir Jothar te an ni tih finfiah a nih thu leh, Lashkar-e-Taiba (LeT) mi leh sa vek an nih thu a sawi.

Nimin khan Lok Sabha-ah Operation Sindoor leh Pahalgam beihna chungchangah debate neih chhunzawm a ni a, Amit Shah chuan J&K-a hel kahhlumte chungchang hi a sawi tel nghal a, helpawl lo humhimtu an mante aṭanga finfiah a nih thu house hi a hrilh. Shah chuan Article 370 nuaibo a nih hnuah J&K huam chhunga helpawl chetna a tlak hniam thute a tarlang nghal.

Shah chuan Intelligence Bureau (IB) hnen aṭanga Dachigam huam chhunga helpawl mi pathum awm nia thu an dawn hnuah, Operation Mahadev chu May 22 aṭang khan kalpui a nih thu a sawi. He mi hnu aṭang hian chhum lo chat loin IB leh sipaite chuan beihpui an thlak ṭhin tih chu sawiin, Thawhṭanni an mi kahhlumte hnen aṭang hian ralthuam M9 carbine leh AK-47S man a ni a, hengte hi Pahalgam beihnaa hman a nih thu Chandigarh Forensic Science Laboratory (FSL)-ah finfiah a ni tawh tih a sawi lang bawk.