Rahul-a'n naupang 22 zirna tum sak dawn

Congress party hruaitu, Lok Sabha-a Leader of Opposition Rahul Gandhi chuan, Operation Sindoor kalpui a nih laia, Pakistan-in India a beih letna vanga nu leh pa chan, naupang 22 te zirna a tum sak dawn. Heng naupang 22 te hi Line of Control (LoC) hnaiha awm Poonch district Jammu and Kashmir a chengte an nih thu Rahul hian a sawi.

Pakistan beihna avang khan Poonch leh Rajouri huam chhungah hian hliam leh chenna in chhia eng emaw zat an awm bawk a ni. Heng hmunte hi May thla khan Rahul Gandhi chuan a tlawh tawh a, hemi ṭum hian naupang sikul kal rual, nu leh pa emaw a khawi zawk zawk emaw chante hming dilin, an tana hma a lak tur thu a lo sawi tawh tih Pradesh Congress Committee president Tariq Hameed Karra chuan a sawi a ni.

Naupang 22-te hi Poonch district huam chhunga mi chauh niin, nu leh pa chan hi heng ai hian an la tam rin a ni bawk. Operaton Sindoor kalpui vanga Pakistan-in a beih letnaah khan Jammu and Kashmir-ah mi 28 an thi a, thi zinga 13 chu Poonch district ami an ni. Karra chuan Thawhlehni khan Poonch tlawhin, Gandhi-a'n naupangte zirna a tum sakna tur sum chu a pe tih a sawi.