'Nun' man chungchangah Shah-in Kerala MP kawm

Chhattisgarh-a Zirtawpni liam taa Government Railway Police (GRP) ten Catholic 'nun' sister pahnih, Vandana Francis leh Preethi Mary te an man chungchangah union home minister Amit Shah chuan nimin khan Kerala MP pathumte a kawm.

Chhattisgarh session court chuan 'nun' man tawkte bail dilna hi Nilaini khan a hnawl sakin. Dilna a hnawl sak hnu hian NIA court-ah chhui chianna kalpui tura dil a ngaih zawk thu a tarlang.

Kerala MP te chuan prime minister Narendra Modi leh Shah hnenah hian rang taka chhuah zalen an nih theihna tura hma la turin an ngen. Man an nihna chhan human trafficking leh sakhaw in leh luihtir tuma puhna chu thu dik tawk lo a nih thu an hrilh. He mi thuah hian Nilaini khan UDF MP NK Premchandram, Benny Behanan leh Francis George te chuan Shah hnenah hian sorkar laipui chu hma la thuai turin an lo ngen tawh bawk.

Shah chuan sorkar laipuiin puih an nih theihna tur leh bail an nih theihna tura tih theih awm ang te tih a nih tur thuin Kerala MP-te hi lo chhang. Heng MP pathumte hian Durg jail-a 'nun' pahnihte hi an lo tlawh tawh bawk a ni.

Congress MP K C Venugopal pawhin Lok Sabha-a Zero Hour-ah sawi chhuakin, 'nun' te chu chhan awm loin ni nga jail-ah dah an ni tawh a, sorkar chu a chet thuai loh chuan thunun theih loh khawpin boruak a alh chhoh mai a hlauhawm thu a sawi. 'Nun' te chu dik lo taka puha man an ni tih a sawi.