ECI-in West Bengal-ah SIR kalpui ve tum

Election Commission of India (ECI) chuan Ningani khan West Bengal chief electoral officer (CEO) Manoj Agarwal chu, state chhunga Special Intensive Revision (SIR) kalpui tura rang taka inbuatsaih turin a hriattir. West Bengal-ah hian nakkum 2026-ah assembly election neih tura ruahman a ni.

West Bengal-a SIR kalpui tur hi, Bihar-a kalpui mek, eptu pawl lamin nasa taka an dodal leh sawisel a ni. SIR hmang hian voter tam tak paih a, NDA sorkar-in a hlawkpui theih tur a kalpui niin an sawi.

ECI-in hriattirna a tih chhuah hnu hian chief minister Mamata Banerjee chuan state chhunga district magistrate zawng zawng nen, state adminitrative headquarter Nabanna-ah meeting an nei nghal. District megistrate meeting-ah hian SIR kalpuina atana camp buatsaih dan te, complain lo dawnsawn dan leh, state-a chengten harsatna an tawh chinfel dan tur video presentation an en ho nghal a ni.

CEO Agarwal hnenah hian booth-level officers (BLO) leh supervisory booth-level officer ruat turin ECI chuan a hriattir a, ruat chhuahte chu commission hnena thehlut nghal turin a ti bawk. BLO atan hian sorkar hnathawk nghette chauh ruat turin a hrilh a, CEO chu booth-level agents (BLA), party hrang hrang aiawh ruat turin an hriattir. CEO hian nimin Zirtawpni khan party tinte chu an aiawh hming pe tur hian a hriattir nghal bawk. State CEO office chuan BLO leh BLA hi chenna in hrang hrangah kalin, SIR chu mipuite an hrilhfiah dawn a, a pawimawh dan leh kalpui a ṭul dante an hrilh dawn a ni, a ti. BLO te hian an mawhphurhnate hi an hlen ṭhat loh chuan ECI ah hriattir an ni dawn tih a tarlang.

CM Banerjee chuan district magistrate-te nena meeting-ah hian, sorkarin programme a lo ruahman tawh chu kaltlang pui turin a hriattir a, 'Our Neighbourhood, Our Solution' tih hmanga hmalakna chu vawiin Inrinni aṭanga ṭan tum a ni. Programme hi sorkar hmalakna leh chinfel ngai buaipuina tura tih a ni a, hemi hnuaiah hian August 2 - November 3 thleng camp buatsaih tum a ni.