India-ah ni khatah Covid-19 kai thar 1,897 leh Hri vanga thi mi 73 an awm
Union Health and Family Welfare Ministry in a tarlan danin, Thawhlehni khan India ramah Covid-19 kai thar mi 1,897 an awm a, he hri vanga thi hi mi 73 an awm bawk. Hei hi ni khat thilthua hri vanga thi an tam ber ṭum a la ni.
India ramah hri kai hi nimin thleng khan mi 31,332 an awm tawh niin health and family welfare ministry chuan a tarlang a, thi hi 1,007 an tling tawh bawk. Hri kai zinga 7,695 hi enkawl dam an ni tawh bawk a ni.
Maharashtra chu Covid-19 kai tamna ber state niin, Thawhlehni khan mi 829 in an kai thar a, hri kai hi an vaiin mi 9,318 an awm tawh a, mi 400 in an thihpui tawh. State chhungah mi nuai 1.55 chu mahni ina inkhung hrang tura tih mek an ni a, sorkarin inkhung hranna tur a siamah mi 10,000 vel an awm bawk. Mumbai khawpui bikah hri kai hi 6,000 an awm.
Gujarat-ah chuan Thawhlehni khan hri kai thar mi 226 awmin mi 19 an thi. An state-a hri kai hi 3,744 a tling tawh a, mi 434 enkawl dam tawhin 181 in an thihpui tawh a ni.
Delhi-ah hri kai 3,314 an awm a, an zinga 54 chuan an thihpui a ni. Delhi sorkar chuan journalist 529 test neih sakin, an zinga pathumin hri hi an kai tih hriat a ni.
Madhya Pradesh-ah hri kai thar 19 an awm a, hri kai awm zat hi 2,387 an tling tawh a, mi 54 in an thihpui tawh.
CRPF battalion-a sipai 47-in Covid-19 kai
Delhi, Mayur Vihar-a Central Reserve Police Force (CRPF) 31st battalion-a sipai 47-in Covid-19 an kai tih hriat a ni a, Thawhlehni khan sipai pakhat he hri vang hian a thi bawk.
He battalion-ah hian CRPF 1000 dawn an awm a, an vai hian khunghran nghal an ni a, an zinga mi 47-te hi Mandawali-ah enkawlna pek mek an ni. Sipai 257 test result chu nghah mek a ni a, sanitiser machine pawh battalion-ah hian dah nghal vek a ni tawh.
Thawhlehnia Safdarjung Hospital-a Covid-19 vanga thi hi kum 55 mi CRPF-a sub-inspector Mohammad lkram Hussain a ni a, April 24 khan Covid-19 a kai tih finfiah a ni. Zunthlum bakah hypertension nasa tak a nei tih doctor-te chuan an sawi.
CRPF 31st battalion-a hri darh chhan hi an zinga sipai thi ta lkram Hussain khan April 16 -18 a unit hospital a tlawhna lamah Covid-19 paramedic unit-a medical staff, nursing assistant aṭanga a kaichhawn nia sawi a ni. He nursing assistant hi venthawn thilah April 7-16 khan khunghran a ni a, hemi hnu hian a taksa lamah hri a kai tih lanchhuahna engmah a neih loh avangin, 31st battalion-ah hian duty tir leh a ni. April 17 khan a taksaah natna a rawn lang chhuak ṭan a, April 20 khan Covid-19 a kai tih finfiah a ni zui a, Delhi-a Rajiv Gandhi Hospital-ah enkawlna pek mek a ni.