PM Modi-an ramchhunga thil siam lei leh hralh uar turin chah

Prime Minister Narendra Modi chuan Inrinni liam taa Varanasi a tlawh ṭuma vantlang inkhawma thu a sawiah, ram mipuite chu tualchhunga siam chhuah leh tharte lei leh hralh chhuah uar turin a chah.

Prime Minister thusawi hi US president Trump-in Nilaini liam taa India aṭanga bungraw chawkluha chhiah lak 25% a a tih pun hnu leh, Russia aṭanga crude oil leh ralthuam lei vanga pawisa chawi belh tir tur a puanin a nghawng nia ngaih a ni.

Modi chuan 'Swadeshi goods' ramchhunga siam chhuah bungrua leh thil hrang hrangte lei leh hralh tam a ngaih thu a sawi. India chu tun dinhmunah khawvel puma economy ṭhang duang ber a nih thu sawiin, khawvela economy lian pathumna ni thei tur chuan ramchhung thil tharte lei leh hralh uar a ṭul a ni, a ti.

PM chuan heng hmalakna te hi hmalam hun hriltu tur a nih thute a sawi a, India hnampa Mahatma Gandhi hriatrengna tura hmalakna dik tak a nih thu a sawi lang bawk. Heng bakah hian sorkar laipui chuan loneitute hamṭhatna atana ke a pen mek thu a sawi a, India chu agriculture thar chhuah, bawnghnute, leh GM Foods hmanga insumdawn tawnna inremna US nena an siam, bilateral trade agreement (BTA)-ah a dinna ngaiah nghet taka an la din tlat thu a tarlang.

Ram intodelhna tur atana kawng zawh mekah loneitu, small industry, leh ṭhalai hnathawh tur chungchangte chu sorkar in a dah pawimawh hmasak thu sawiin," Sorkar chuan a tih theih ang zawng zawng a buaipui mek. Mahse, hemi thleng tur chuan mipui pawhin tih ve tur kan nei a ni" tiin, hengte hi India economy tih hmasawnna tur atana hmalakna pawimawh tak a ni tih PM chuan a sawi.