Gulf-a tangkhangte lachhuak turin India lawng pathum a inpeih
Indian Navy lawng pathum chu Gulf rama tangkhang India mite la chhuak turin an inpeih reng a, heng lawng pathumah hian mi 1,500 aṭanga 2,000 vel an leng a ni.
Indian Navy lawng-te bakah hian Indian Air Force leh Air India thlawhtheihnate pawh a ṭul huna che chhuak turin an inpeih reng bawk. Official-te chuan May 3 aṭangin India mite hi an thiar chhuak ṭan dawn tih an sawi a, Navy lawng hi chu a tawp bera hman tur niin an sawi thung. Thiar chhuah tur hi an tam viau chuan Air Force leh Air India ṭanpui turin lawng lian pathum hi tirh an ni ang.
Indian Navy lawngte hi tangkhangte phurh chhuahna atan hian an hmang ngei ngei dawn tihna a ni lo a, mamawh a nih chuan an tir chhuak chauh dawn a ni. Tirhchhuah an nih pawhin social distancing kalpui a ngaih dawn avangin an phurh theih ang zat aia tlem fe an phurh a ngai dawn.
INS Jalashwa pawh hian mi 1,000 chuang phur thei mah se tangkhangte hi chu 700 vel bak an chuan tir rin a ni lo. Lawng dangte hian 400-500 bak an phur thei dawn lo a ni.