Covid-19 dona turin ADB-in US dollar vbc 1.5 puk tir
Asian Development Bank (ADB) chuan Covid-19 Active Response and Expenditure Support Programme (CARES) kaltlangin, Covid-19 dona tur atan US dollar vaibelchhe 1.5 chu India a puk tir tih finance ministry chuan a tarlang.
Heng pawisa te hi India rama industry leh entrepreneur-te tana ruahman niin, a bik takin micro, small, and medium-sized enterprises (MSMEs) te tana tih a ni bawk. Hri leng vang hian ramchhunga sumdawng tenau zawkte chuan harsatna nasa tak an tawk chho mek a, heng harsatnate hi phuhruk a nih theih nan pawisa hi a puk a ni.
Department of Economic Affairs (DEA) additional secretary Sameer Kumar Khare chuan a hun taka ADB-in India a ṭanpui chu lawmawm a tih thu a sawi a, heng pawisa te hi thla thum chhunga India rama mihring maktaduai 800 chuang mamawh a phuhruk theih a rin thu a sawi bawk.
March 26 khan finance minister Nirmala Sitharaman chuan Covid-19 avanga harsatna tawkte chhawmdawl nan, Pradhan Manti Garib Kalyan Yojana kaltlangin sorkarin US dollar vbc 1.7 a ruahman tih a puang a, heng pawisa te hi mirethei zawkte eitur pek nan te, gas a thlawna sem nan leh an bank account-a pawisa thunsak nan tea hman a ni.
India-a ADB director Kenichi Yokoyama chuan India-in thutlukna huaisen tak hmanga Covid-19 hri beihna kawnga hma a la chu lawmawm a tih thu a sawi a, sorkar nen ṭangkawp zelin he hri beihna kawnga mipuite harsatna tawh tur sutkian a nih theih nan leh, hriselna lama hma an sawn theih nan ruahmanna hrang hrang ngaihtuah chhoh zel a ni ang, tiin a sawi bawk.