Bihar-in state bil enkawl NCB hran din tum

Bihar sorkar chuan state chhunga ruihhlo tawlhrukna hluar zel venna turin state bil enkawl narcotics control bureau (NCB) din an tum thu an puang. Tun dinhmunah ramchhungah state bil enkawl NBC nei hi Punjab leh Haryana an awm tawh a ni.

Kum 2016-a ruihhlo khapna dan thar hman a nih hnuah,Bihar-ah hian ruihhlo hmanga sumdawnna a hluar zual hle. Hei vang hian state bil enkawl NCB hi din tum a ni a, additional director general (ADG) Kundan Krishnan chuan sorkar laipuiah pawh an thlen tawh tih nimin khan a sawi.

State enkawl NCB din tur hi ADG rank officer-te enkawlna hnuaia kalpui tum niin, ruahmanna pawh peihfel tawh a ni. NBC dinna tur sorkar laipuia thlen chu August chhung ngeia pawm hman beisei a ni a, pawm a nih hnuah bureau hnuaia post hrang hrangte hnawhkhah nghal tum a ni.

Tun dinhmunah Bihar-ah hian special task force(STF) hnuaiah a hranin narcotic cell hi ruihhlo tawlhruk do tura din a ni a, STF-a thawkte chu state NBC-ah hian chhawr zui tum a nih thu ADG Krishnan chuan a sawi. Narcotic bureau hian ruihhlo kaihhnawiha mante chunga hmalakna zawng zawng an buaipui bakah, ruihhlo vanga harsatna tawkte enkawl kawngah health department nen an thawk dun mek bawk.

National Crime Record Bureau-in a tarlan danin, Narcotic Drugs & Phototropic Substance Act hnuaiah hian Bihar chuan kum 2018 khan thubuai 625 an ziak lut. Kum 2022 khan case hi pungin mi 1,823 lakah thubuai ziah luh a ni a, kum 2024 khan ruihhlo kaihhnawih thubuai 1,989 ziah a ni.