HP-a tuilian leh leimin vangin mi 184 thi tawh

Himachal Pradesh chuan kuminah ruah tui tla tam vangin harsatna a tawk nasa hle a, hmun hrang hrangah leimin leh tuilian thlengin hriat theih chinah mi 184-in an thih phah tawh. Chhiatna thleng vang hian vawiin hian kawngpui 309, 'NH 305' telin khar a ni dawn.

State Emergency Operation Centre (SEOC) record-in a tarlan danin, kumin June 20 aṭanga August 3 thleng khan mi 184 thi tawhin, ruahsur kaihhnawih chhiatna thleng vang hian mi 103 an thi a, mi dang 81 chu kawngchhiaah lirthei chesual vangin an thi bawk a ni.

State chhung hmun hrang hrangah ruahsur hian chhiatna thlenin tui lakna hmun 236 hman theih lohin a awm a, inkalpawhna kawngpui hman theih loh eng emaw zat a awm bawk. District hrang hrang zingah Mandi chu a tuar nasa ber niin ruahsur leh lirthei accident vangin mi 37 an thi tawh a ni. State Disaster Management Authority chuan tun hnaiah ruah a la sur chhunzawm dawn tih sawiin, mipuite chu chhiatna thleng thei lakah fimkhur turin a chah zui bawk.