Jharkhand CM hlui Shibu Soren a thi

Jharkhand-a rorel lai, Jharkhand Mukti Morcha (JMM) party dintu zing mi, chief minister hlui leh Rajya Sabha member ni lai, Shibu Soren chu kum 81 mi niin Thawhṭanni zing khan Sir Ganga Ram Hospital, New Delhi-ah kal lam fel lo vangin a thi. Damdawi-inah hian thla khat kalta aṭang khan stroke vangin enkawl a ni.

Jharkhand sorkar chuan CM hlui Soren hi state pumah ni thum chhung sun a ni dawn tih a puang. Hemi chhung hian hnam puanzar chu a ngul chanvein zar a ni ang. Soren sunna atan nimin Thawhṭanni khan Rajya Sabha-ah rorel inkhawm tihtawp a ni bawk.

Political party hrang hrang te'n Soren an ui thu an tarlang nasa hle a, prime minister Narendra Modi pawhin nimin vek khan a thihna damdawi-inah thlahna hun hmangin a kal. PM chuan Soren chu tribal mite tana thawh hlawk tak leh hmasawnna tur ngaihtuahtu a nih thute a sawi. PM bakah union minister hrang hrang pawhin X kaltlangin an ui thu hi an tarlang bawk.

Jharkhand CM hlui thihna avang hian state assembly monsoon session neih mek pawh tiam chin awm loin tihtawp a ni a, state sorkarin programme a lo duan sa zawng zawng kalpui chhunzawm a ni rih lo ang. Soren hian a nupui Rupi Soren bakah a fapa pahnih Hemant Soren, Basant Soren leh a fanu Anjali Soren te a kalsan a ni.