Defence huanga hmeichhia tel tamna tur ngaihtuah

Parliamentary consultative committee on defence, union defence minister Rajnath Singh-a kaihhruaia neihah armed forces huanga hmeichhia tel tam theihna tur ngaihtuah a ni. Sorkarin armed forces huanga hmeichhia an tel tam theihna tura hma a lak thu Minister chuan a sawi.

Ministry of Defence (MoD) data-ah Indian Air Force (IAF) ah hmeichhia thawktu awm chu 13.4% a ni tih tarlan a ni a, force dang pathum awm zingah asang filawr a ni. Army-ah 6.85% leh Navy-ah hmeichhia thawktu 6% an awm mek bawk. Kum 2024 khan Army-ah hmeichhia 1735, Air Force-ah 1614, leh Navy-ah 674 an awm a, kum 2006-ah khan force hrang hranga hmeichhia thawktu awm hi 1,495 chauh an ni thung.

Army-ah hmeichhia officer nih theihna hi branch 12 awmin heng zingah hian combat huang pawh a tel. Navy-ah erawh branch hrang hrangah hmeichhia officer awm theihin submarine-ah erawh a theih loh a, hetih laiin Air Force-ah erawh branch zawng zawngah hmeichhiate tan officer a nih theih thung a ni.

MoD official chuan force-a hmeichhiate tel theihna chungchanga zawhna chhangin, hmeichhia thawktu an pun theihna tura branch thar hawn belh bakah category zawng zawngah hmeichhe tan siam belh tum a ni a ti. Operation Sindoor kalpuinaah pawh khan Indian Army-a Colonel Sofiya Qureshi chuan a thawh hlawk hle.