SC-in EC hnenah Bihar voter paih zat kimchang pe turin hrilh

Supreme Court(SC) chuan nimin, Nilaini khan Election Commission hnenah August 9 ral hmaa Special Intensive Revision (SIR) kaltlanga Bihar-a voter nuai 65 paih an nih dan tarlanna kimchang pe turin a hriattir.

Bihar-a SIR kalpui a nih chungchangah NGO, Association For Democratic Reforms chuan court-ah petition a thehlut a, EC chuan Bihar-a inthlan neih a nih dawn hnaihah chauh roll ennawnna a kalpui a ni, a ti. Supreme Court hian Bihar-a SIR a kalpuinaah voter eng emaw zat paih a nih ngei chuan a inrawlh dawn tih a lo sawi tawh a ni. Justice Surya Kant, Ujjal Bhuyan leh N Kotiswar Singh awmna bench chuan EC hnenah hriattirna hi a pe a ni.

EC chuan voter paih list kimchang hi political party leh NGO te a hlan tawh a, EC-in voter nuai 65 bawr paihte hi thi tawh leh awmna sawn nghet tawhte niin an tarlang.

Hetih lai hian bench chuan ECI counsel hnenah hian voter paihin a nghawng tur hriat nan data kimchang pe tur hian a ti a, ngenna hi Inrinni hma ngei a chhang tura tih bakah, petition thehluttu advocate Bushan chu roll ennawnte chu entir tur a ti bawk. Hetih rual hian court chuan roll aṭanga paih an nih chhan kimchang chu zawhfel a nih hunah tarlan a nih tur thu leh, tuna mi chu draft chauh a la nih thu a hrilh nghal bawk.

SC chuan Bihar-a SIR kalpui a nih chungchang khinnate chu August 12 leh 13 ah a ngaihtuah leh dawn a, SIR draft data chu tichhuak lo turin a 'stay' sak bawk. Inthlan hmabak Bihar-a SIR kalpui danah hian voter paih ṭeuh leh belh ṭeuh awm thei nia sawi niin, voter-te nihna finfiahna atan SC chuan EC chu Aadhaar leh voter ID-te pawm chhunzawm turin a hrilh bawk a ni.

SIR kalpui mekah hian August 1 khan roll draft chu tihchhuah a ni a, September 30 ah final roll tihchhuah tum a ni bawk. Roll ennawn hna kalpui mek chungchang hi sawiselin, eptu party-te chuan parliament monsoon session neih mekah house pahniha rorel mumal theih lohin an duh loh thute an aupui bawk.