House pahnihah bill pakhat ve ve pass a ni

Parliament Monsoon session chu nimin Nilaini khan a ni 13-na atan ṭhutkhawm leh a ni a, eptu pawl lamin Bihar-a Special Intensive Revision (SIR) kalpui duh lohna lantira an aubuai chhunzawm avanga rorel inkhawm tihtawp lailawk a ni chungin Lok Sabha leh Rajya Sabha-ah bill pakhat ve ve pass a ni.

Lok Sabha ṭhutkhawm chu in aubuaina chhuak vangin chawhnu dar 2 thleng tihtawp a ni a, ṭhutkhawm ṭan a nih leh hnuah rei lote chhung sawi hona neiin Merchant Shipping Bill, 2024 an pass. Rajya Sabha-ah pawh eptu pawl aubuaina karah Carriage of Goods by Sea Bill, 2025 chu pass a nih hnuah house tihtawp lailawk a ni zui nghal bawk.

Monsoon session neih mekah eptu lam aubuaina karah Thawhlehni khan Lok Sabha-ah ṭhutkhawm tihtawp a nih hmain 'Readjustment of Representation of Scheduled Tribes Assembly Constituencies of the State of Goa, 2024 Bill' chu pawm a ni bawk. Hetih laiin ngaihven hlawh National Sports Governance Bill, 2025 erawh karleh lamah sawi ho tum a ni thung.

Parliament rorel tikhaihlaktu, SIR chungchangah pawh parliamentary affairs minister Kiren Rijiju chuan eptu pawlte chu Supreme Court-ah ngaihtuah mek a nih avangin parliament-a sawihona neih a rem rih loh thu a hrilh a, eptu pawlte chu rorel tibuai lo turin a ngen zui bawk.