Sports Bill ennawn leh turin an ngen

Parliament monsoon session neih mekah eptu pawl hruaitute chuan Nilaini khan Lok Sabha speaker Om Birla hnenah National Sports Governance Bill, 2025 leh National Anti-Doping (Amendment) Bill, 2025 chu Joint Parliamentary Committee (JPC) hnenah ennawn tir leh turin an ngen.

Eptu party hruaituten speaker hnena lehkha an thawnah hian bill pahnihte hi pharh a nih hmaa ennawn leh ṭul nia an hriat thu an hrilh. Lehkha thehluhah hian,"Bill pahnihte chu ram tana nghawng lian tak nei an nih avangin, uluk zual zawka ennawn leh a nghawng theih tur awmte thlir chungin Joint Parliamentary Committee (JPC) ah ngaihtuah nise kan duh a ni," an ti.

Speaker hnena lehkha thehluhah hian party hrang hrang aiawh mi 12-in hming an ziak a ni. Sports bill thar hian India rama sports huangah nghawng lian tak a nei dawn a, inrelbawlna leh kaihhruaina mai bakah ramchhung sports hmelhmang thlenga a nghawng theih dawn avangin eptu party hruaitute hian uluk zawka ngaihtuah hi an phut tih an sawi.

National Sports Governance Bill hian national sports body leh an hnathawh theihte a nghawng dawn a, hetih laiin National Anti-Doping Bill erawhin infiamna huanga dan phal loh damdawi lam hmanna tur khapna a thuam chak dawn a ni.