Punjab-in gym kalte leh fitness lam tuite tan kaihhruaina tichhuak

Gym-a exer la leh infiammite zinga tun hnaiah lunglam fel lohna awm vanga thihna thleng ṭhin a pun avangin heng mite pual hian Punjab sorkar chuan kaihhruaina a tichhuak. Kaihhruaina tih chhuahah hian gym kal tur leh fitness lam buaipui tur chu an hriselna endik hmasa ṭhin turin a ti.

Punjab health minister Dr Balbir Singh chuan kaihhruaina siam hi Punjab-in mission a kalpui,"Swasth Punjab-Surakshit Punjab" hnuaia mi niin a thupuiah 'Prevention of Sudden Cardiac Arrest Among Gym Goers and Sportspersons' tih hman a ni tih a sawi. Mission kaltlang hian mipuite himna tur leh taksa tlin tawk insawizawina hriat pawimawhna lam inzirtir a ni.

Kaihhruaina tihchhuah hi sorkar hmalakna hnuaia pawl hrang hrang Punjab Agricultural University (PAU), Guru Angad Dev Veterinary, Animal Sciences University (GADVASU) leh Dayanand Medical College and Hospital (DMCH) hnuaia zirchianna an neih aṭanga siam a ni. Sorkar chuan gym leh sport centre zawng zawng chu kaihhruaina siamte langsar taka pholang turin a hriattir bawk.