NCERT-in Class 8 textbook-a Map endik tur panel din

National Council for Educational Research and Training (NCERT)-in pawl riat social science textbook-a India map an dahah, Maratha lalram huam chhunga Jaisalmer rin luh tel chu a dik tawk lo nia sawi a awm avangin ennawn turin mithiam bik awmna panel an din. Team hian finfiahna awmte nen endikin an hmuhchhuahte an theh lut leh ang.

Tun hnai khan Jaisalmer lal chhungkua, Chaitanya Raj Singh Bhati chuan Marathi huam chhunga rin luh an ni chu a dik lo tiin social media-ah a tarlang. Hemi hnu hian union education minister Dharmendra Pradhan hnenah 'hriatsual, a tak behchhan ni lo leh dik tawk lo' tiin endik tur hian a thlen a ni.

Council chuan endik kalpui dan tur chungchang sawiin," Tun dinhmunah NCERT chuan zirna kaihhnawiha textbook ṭhenkhatah dik tawk lo leh fel lo awm nia sawi chu endikna nei tur leh, zirchiang turin committee a din ṭhin a ni" a ti. Committee-ah hian thiamna nei sang leh sulhnu nei ṭhate bakah subject hrechiangtute chu Curriculum Department Head enpuina hnuaiah endik hna hi an thawk dawn tih an sawi bawk.

Official lam chuan textbook-a siam danglam awmte chu National Education Policy 2020 zulzui a siam leh buatsaih a ni tih an tarlang a, sawiselna awm zirchianna neih hi a rang thei anga thehlut turin committee hi hriattir an ni.