DCGI-in Covid-19 vaccine pahnih a pawm
India rama damdawi lama thuneitu sang Drugs Controller General of India (DCGI) chuan nimin kham Covid-19 vaccine pahnih, Covishield leh Covaxin chu emergency-a hman atan a pawm.
Covishield hi Oxford Institute leh AstraZeneca-te vaccine siam a ni a, Pune-a Serum Institute of India (SII) chuan enchhin hna a thawk mek a ni. Covaxin hi Hyderabad-a Bharat Biotech leh ICMR (Indian Council for Medical Research) thawkdunin an siam a ni thung.
Prime minister Narendra Modi chuan vawi khata emergency atana Covid-19 vaccine pahnih pawm a ni thei chu thil lawmawm tak a nih thu a sawi a, vaccine siamna kawnga thawktute lawmpuina a hlan. DCGI in vaccine pahnih a pawm ta chu India ram hriselna tur leh Covid hripui laka fihlim ram siamna tura thutlukna pawimawh tak a ni, a ti.
Drug Controller General of India VG Somani chuan vaccine pahnih chu a 100% a a rinthlak thu a sawi ve bawk.
Hri kai thar 18,177 awm
India ramah Inrinni liam ta khan Covid-19 hri kai thar mi 18,177 an awm leh a, hri vanga thi mi 217 an awm belh leh bawk.
Ram puma hri kai hmuh tawh hi mi 10,323,965 awmin,an zinga 1,49,435 in an thihpui tawh a ni.
Inrinni vek khan hri kai enkawl dam 20,923 an awm a, enkawl dam tawh hi mi 9,927,310 tling tawhin, national recovery rate hi 96.15% a tling tawh.