India leh Oman-in FTA neih thuai beisei

India leh US insumdawn tawnna lama harsatna a awm chhoh mek karah, India leh Oman chuan insumdawn tawnna tur, free trade agreement (FTA) ziah fel thuai an tum tih official chuan an tarlang.

Ram pahnihte hian inremna tur hi thuphungin pawm tawhin, tihfel leh ziah chu an ngaihtuah mek niin tarlan a ni a, thla hnih emaw thla thum emaw hnuah peihfel hman tum a nih thu an sawi. Official chuan inremna neih a nih theihna tur hian Comprehensive Economic Partnership Agreement (CEPA) chu kum 2023 November aṭanga neih ṭan tawh niin an sawi.

Insumdawn tawnna neihna tur atan hian ram pahnihte chuan bungraw lei aṭanga chhiah lak leh custome duty chawi ngaite chu a tlem thei ang ber turin an ruahman a, dan ṭhenkhat pawh service leh investment a pun theih nan an thlahdul bawk. Oman hi Gulf Cooperation Council (GCC) ram zingah India sumdawnpui lian ram pathumna a ni a, GCC member UAE pawh India chuan May 2022 aṭang khan inremna a neihpui tawh a ni.

India leh Oman ram insumdawn tawnna hlut zawng hi 2024-25 inkar khan USD tld 10 a ni a, India-in a thawnchhuah USD tld 4.06 leh chawkluh USD tld 6.55 a tling. India hian Oman aṭangin petrol leh urea chawk lut tam berin 70% a tling, hei bakah propylene, ethynele polymers, pet coke, gypsum, chemical, iron leh steel te a chawlut bawk.